ဇွန် ၁၁၊ ၂၀၂၆
The Kaladan Post
 
ထိုင်ဝမ်ကျွန်းရဲ့ အရှေ့ဘက်ကမ်းလွန်ရေပြင်မှာ တရုတ်နိုင်ငံက ကင်းလှည့်စစ်ဆေးမှုတွေ လုပ်ဆောင်ခဲ့တာနဲ့ ပတ်သက်ပြီး ထိုင်ဝမ်ရဲ့ ပင်လယ်ရေကြောင်း အချုပ်အခြာအာဏာကို လာရောက်ထိပါးလို့ မရဘူးလို့ ထိုင်ဝမ်ကမ်းခြေစောင့်တပ်က ဇွန်လ ၁၁ ရက်နေ့မှာ ပြင်းပြင်းထန်ထန် တုံ့ပြန်ပြောဆိုလိုက်ပါတယ်။
 
တရုတ်နိုင်ငံဟာ ပြီးခဲ့တဲ့ စနေနေ့ကစလို့ ထိုင်ဝမ်အရှေ့ဘက်ရေပြင်မှာ “အထူးပင်လယ်ရေကြောင်း ဥပဒေစိုးမိုးရေး စစ်ဆင်ရေး” အမည်နဲ့ ကင်းလှည့်သင်္ဘောတွေ စေလွှတ်ခဲ့တာပါ။ အဆိုပါ စစ်ဆင်ရေးအတွင်း ဖြတ်သန်းသွားလာတဲ့ သင်္ဘောပေါင်း ၁၉၈ စင်းကို စစ်ဆေးခဲ့ပြီး သင်္ဘော ၃ စင်းရဲ့ စည်းကမ်းဖောက်ဖျက်မှုတွေကို အရေးယူခဲ့တယ်လို့ တရုတ်အစိုးရပိုင် မီဒီယာတွေက ဗုဒ္ဓဟူးနေ့ညပိုင်းမှာ ထုတ်ပြန်ခဲ့ပါတယ်။
 
ဒါပေမဲ့ ထိုင်ဝမ်ဘက်ကတော့ တရုတ်ရဲ့ အခုလုပ်ရပ်ဟာ အဆိုပါရေပြင်အပေါ် စီရင်ပိုင်ခွင့်ရှိသယောင် အထင်မှားအောင် လုပ်ဆောင်တာသာ ဖြစ်တယ်လို့ ဆိုပါတယ်။ “ဒီရေပြင်မှာ ပေကျင်းအစိုးရအနေနဲ့ စီရင်ပိုင်ခွင့် လုံးဝမရှိပါဘူး။ တရုတ်သင်္ဘောတွေ ပေါ်လာတိုင်း ကျွန်တော်တို့ရဲ့ ကမ်းခြေစောင့်တပ်က အင်အားသုံး မောင်းထုတ်သွားမှာဖြစ်ပြီး ရေကြောင်းလွတ်လပ်ခွင့်နဲ့ လုံခြုံရေးကို ဆက်လက်ထိန်းသိမ်းသွားမှာပါ” လို့ ထိုင်ဝမ်ကမ်းခြေစောင့်တပ်က အတိအလင်း ပြောကြားထားပါတယ်။
 
ဒီပဋိပက္ခဟာ ပြီးခဲ့တဲ့လက ဂျပန်နဲ့ ဖိလစ်ပိုင်နိုင်ငံတို့ကြား သူတို့ရဲ့ ပင်လယ်ပြင် နယ်နိမိတ်တွေနဲ့ ပတ်သက်ပြီး တရားဝင် ဆွေးနွေးမယ်လို့ ကြေညာခဲ့ရာကနေ စတင်ခဲ့တာပါ။ တရုတ်နိုင်ငံကတော့ အဲဒီရေပြင်တွေဟာ ထိုင်ဝမ်နဲ့ ဆက်စပ်နေတဲ့အတွက် သူတို့ရဲ့ ပိုင်နက်အဖြစ် ရှုမြင်ကာ အခုလို ကင်းလှည့်စစ်ဆေးမှုတွေနဲ့ တုံ့ပြန်လာတာ ဖြစ်တယ်လို့ သိရပါတယ်။
 
လက်ရှိမှာတော့ တရုတ်ဘက်က ကင်းလှည့်မှုတွေ ပြီးဆုံးသွားပြီလို့ ဆိုပေမဲ့ ထိုင်ဝမ်ဘက်ကတော့ သူတို့ရဲ့ အချုပ်အခြာအာဏာကို အကာအကွယ်ပေးဖို့အတွက် အမြဲတမ်း အသင့်ရှိနေတယ်လို့ သတင်းထုတ်ပြန်ချက်အရ သိရှိရပါတယ်။
 
Source: Reuters