ဇွန် ၂၅၊ ၂၀၂၆

The Kaladan Post

 

ဂျပန်အစိုးရဟာ နိုင်ငံရဲ့ စီးပွားရေးတိုးတက်မှုကို အထောက်အကူဖြစ်စေဖို့အတွက် ပုဂ္ဂလိက ဝယ်လိုအားကို ပံ့ပိုးပေးမယ့် ငွေကြေးမူဝါဒတွေ ချမှတ်ပေးဖို့ ဂျပန်ဗဟိုဘဏ် (Bank of Japan – BOJ) ကို တိုက်တွန်းသွားမယ်လို့ ရိုက်တာသတင်းဌာနက ရရှိထားတဲ့ ရေရှည်စီးပွားရေးစီမံကိန်း မူကြမ်းအရ သိရပါတယ်။ ဒါဟာ ဗဟိုဘဏ်အနေနဲ့ လက်ရှိချေးငွေအတိုးနှုန်းတွေကို ဆက်လက်လျှော့ချထားပေးဖို့ အစိုးရက လိုလားနေတယ်ဆိုတာကို ပြသလိုက်တာပဲ ဖြစ်ပါတယ်။

ဗုဒ္ဓဟူးနေ့က ထွက်ပေါ်လာတဲ့ မူကြမ်းအရ “အစိုးရအနေနဲ့ ဂျပန်နိုင်ငံကို ငွေကြေးဖောင်းပွမှု ကျဆင်းတဲ့ အခြေအနေ (Deflation) သို့ ပြန်မရောက်စေဖို့အတွက် လျင်မြန်ပြီး လုံလောက်တဲ့ ခြေလှမ်းတွေကို မဆိုင်းမတွ လုပ်ဆောင်သွားပါမယ်။ စီးပွားရေးနဲ့ ဘဏ္ဍာရေးမူဝါဒတွေအောက်မှာ ခိုင်မာတဲ့တိုးတက်မှုရရှိအောင် ကြိုးပမ်းနေတဲ့အတွက်၊ တည်ငြိမ်တဲ့ ဈေးနှုန်းမြင့်တက်မှုတွေကတစ်ဆင့် ပုဂ္ဂလိက ဝယ်လိုအားကို ပံ့ပိုးပေးမယ့် သင့်လျော်တဲ့ ငွေကြေးမူဝါဒက အလွန်အရေးကြီးပါတယ်။” လို့ ဖော်ပြထားပါတယ်။ ဒါ့အပြင် ဗဟိုဘဏ်အနေနဲ့ အစိုးရနဲ့ အနီးကပ်ပူးပေါင်းဆောင်ရွက်ရမယ်ဆိုတဲ့ ဥပဒေပြဋ္ဌာန်းချက်တွေကို ကိုးကားပြီး၊ ဝန်ကြီးချုပ် ဆာနေး တာကာအီချီ (Sanae Takaichi) ရဲ့ စီးပွားရေးတိုးတက်မှု ပြန်လည်မြှင့်တင်ရေး ရည်မှန်းချက်တွေနဲ့ ကိုက်ညီအောင် ဗဟိုဘဏ်က မူဝါဒတွေ ချမှတ်ပေးဖို့လည်း တိုက်တွန်းထားပါတယ်။

ဒီမူကြမ်းဟာ လာမယ့် ဇူလိုင်လမှာ အပြီးသတ်ရေးဆွဲမှာဖြစ်ပြီး ဝန်ကြီးချုပ် တာကာအီချီ လက်ထက် ပထမဆုံး စီးပွားရေးမူကြမ်းလည်း ဖြစ်ပါတယ်။ တာကာအီချီ ဟာ ဘဏ္ဍာရေးနဲ့ ငွေကြေးမူဝါဒတွေကို ဖြေလျှော့ပေးဖို့ ထောက်ခံအားပေးသူတစ်ဦးဖြစ်ပြီး၊ စီးပွားရေးနှေးကွေးချိန်က ချမှတ်ထားတဲ့ အထောက်အပံ့တွေကို ရပ်ဆိုင်းဖို့ ဗဟိုဘဏ်ရဲ့ ကြိုးပမ်းမှုတွေအပေါ် အရင်ကတည်းက သဘောမတူခဲ့သူ ဖြစ်ပါတယ်။ ဂျပန်ဥပဒေအရ ဗဟိုဘဏ်ဟာ လွတ်လပ်ခွင့်ရှိပေမယ့် မူဝါဒတွေ ကိုက်ညီမှုရှိစေဖို့ အစိုးရနဲ့ အနီးကပ်ပူးပေါင်းဆောင်ရွက်ရမယ်လို့ ပြဋ္ဌာန်းထားပါတယ်။ ဒါကြောင့် ငွေကြေးဖောင်းပွမှုပစ်မှတ် ၂ ရာခိုင်နှုန်းကို ရေရှည်တည်တံ့အောင် ထိန်းသိမ်းဖို့နဲ့ လုပ်ခလစာ၊ ကုန်ဈေးနှုန်း တိုးတက်မှုတွေကို အနီးကပ်စောင့်ကြည့်ဖို့ ဗဟိုဘဏ်ကို အစိုးရက တိုက်တွန်းထားတာပါ။

ဝန်ကြီးချုပ် တာကာအီချီ ဟာ ယမန်နှစ် အောက်တိုဘာလက စတင်တာဝန်ယူချိန်ကတည်းက စီးပွားရေးပြန်လည်ဦးမော့လာစေဖို့ ဘဏ္ဍာရေးအသုံးစရိတ်တွေကို တိုးမြှင့်သုံးစွဲခဲ့ပါတယ်။ သူမရဲ့ တိုးတက်မှု မဟာဗျူဟာသစ်အရ AI နဲ့ ချစ်ပ် (Chip) ထုတ်လုပ်ရေး အပါအဝင် မဟာဗျူဟာမြောက် ကဏ္ဍ ၁၇ ခုမှာ ၂၀၄၀ ပြည့်နှစ်အထိ ယွမ် ၃၇၀ ထရီလီယံ (ဒေါ်လာ ၂.၃ ထရီလီယံ) ရင်းနှီးမြှုပ်နှံသွားဖို့ ရည်မှန်းထားပါတယ်။ ဒီလို ကြီးမားတဲ့ အသုံးစရိတ်တွေအတွက် အတိုးနှုန်းသက်သာဖို့ လိုအပ်ပေမယ့်၊ လက်ရှိမှာတော့ ကုန်ဈေးနှုန်းကြီးမြင့်မှု ဖိအားတွေကြောင့် ဗဟိုဘဏ်ဟာ ချေးငွေအတိုးနှုန်းတွေကို တိုးမြှင့်ဖို့ ကြိုးစားနေရပါတယ်။

ဂျပန်ဗဟိုဘဏ်ဟာ အီရန်စစ်ပွဲကြောင့် လောင်စာဆီဈေးနှုန်းတွေ ဆက်တိုက်မြင့်တက်နေတာကို ထိန်းချုပ်ဖို့အတွက် ပြီးခဲ့တဲ့လက ချေးငွေအတိုးနှုန်းကို ၁ ရာခိုင်နှုန်းအထိ တိုးမြှင့်ခဲ့ပြီး ဒါဟာ ၃၁ နှစ်အတွင်း အမြင့်ဆုံးစံချိန် ဖြစ်လာပါတယ်။ လာမယ့် ဇူလိုင်လ ၃၀-၃၁ ရက်နေ့တွေမှာ ဗဟိုဘဏ်အစည်းအဝေး ထပ်မံကျင်းပဖို့ရှိပြီး အဲဒီအစည်းအဝေးမှာ အတိုးနှုန်းကို မပြောင်းလဲဘဲ ဆက်ထားဖို့ မျှော်လင့်ရပေမယ့်၊ အစိုးရရဲ့ နိုင်ငံရေးအရ ဖိအားတွေကြောင့် ဗဟိုဘဏ်ရဲ့ ရှေ့ဆက်လုပ်မယ့် ငွေကြေးမူဝါဒ တင်းကျပ်မှုတွေဟာ ပိုမိုရှုပ်ထွေးလာနိုင်ခြေ ရှိနေပါတယ်။

သတင်း Source: Reuters