ဇူလိုင် ၃၀၊ ၂၀၂၆

The Kaladan Post

အမေရိကန်ပြည်ထောင်စုဟာ AI (Artificial Intelligence) ချစ်ပ်ပြားတွေကြား ဒေတာစီးဆင်းမှု ပိုမိုမြန်ဆန်စေမယ့် နည်းပညာသစ်တွေ တီထွင်နိုင်ဖို့အတွက် GlobalFoundries ကုမ္ပဏီကို အမေရိကန်ဒေါ်လာ သန်း ၃၀၀ ထောက်ပံ့ပေးသွားမှာဖြစ်ကြောင်း ဗုဒ္ဓဟူးနေ့မှာ ကြေညာလိုက်ပါတယ်။ ဒါဟာ ကမ္ဘာ့နည်းပညာ ပြိုင်ဆိုင်မှုမှာ တရုတ်နိုင်ငံကို အသာစီးရဖို့အတွက် သမ္မတ ဒေါ်နယ်ထရန့် အစိုးရက CHIPS Act အရ အရေးပါတဲ့ နည်းပညာတွေမှာ ရင်းနှီးမြှုပ်နှံတဲ့ အစီအစဉ်ရဲ့ အစိတ်အပိုင်းတစ်ခု ဖြစ်ပါတယ်။

အခု ထောက်ပံ့ငွေတွေကို “Silicon Photonics” လို့ခေါ်တဲ့ နည်းပညာကို သုတေသနပြုဖို့ အသုံးပြုသွားမှာပါ။ ဒီနည်းပညာဟာ ချစ်ပ်ပြားတွေကြားမှာ ဒေတာတွေကို လျှပ်စစ်လှိုင်းတွေအစား အလင်းလှိုင်းတွေနဲ့ သယ်ယူပို့ဆောင်ပေးမှာဖြစ်လို့ AI စနစ်တွေမှာ ဒေတာစီးဆင်းမှု ပိုမိုမြန်ဆန်လာစေမှာဖြစ်သလို လျှပ်စစ်ဓာတ်အား သုံးစွဲမှုကိုလည်း သိသိသာသာ လျှော့ချပေးနိုင်မှာ ဖြစ်ပါတယ်။ [အမေရိကန် ကူးသန်းရောင်းဝယ်ရေး ဝန်ကြီးဌာန] ရဲ့ အဆိုအရ အခုနည်းပညာဟာ AI ဒေတာစင်တာတွေကို ပိုမိုထိရောက်စွာ လည်ပတ်နိုင်ဖို့ အဓိက အထောက်အကူပြုမှာ ဖြစ်ပါတယ်။

GlobalFoundries ရဲ့ နည်းပညာပိုင်းဆိုင်ရာ အကြီးအကဲ Gregg Bartlett က “အမေရိကန်မြေပေါ်မှာတင် ကုန်ကြမ်းကနေတစ်ဆင့် စမ်းသပ်စစ်ဆေးပြီးသား အဆင့်မြင့် အလင်းဆိုင်ရာ ပစ္စည်းတွေကို အစအဆုံး ထုတ်လုပ်နိုင်တာဟာ ကျွန်တော်တို့ ကုမ္ပဏီအတွက် ထူးခြားတဲ့ စွမ်းဆောင်ရည်တစ်ခု ဖြစ်လာပါလိမ့်မယ်” လို့ Reuters နဲ့ အင်တာဗျူးမှာ ပြောကြားခဲ့ပါတယ်။ ကုမ္ပဏီအနေနဲ့ ဒေတာပေးပို့မှု အရှိန်နှုန်းကို တစ်စက္ကန့်မှာ ၄၀၀ ဂစ်ဂါဘစ် (Gbps) အထိ ရောက်အောင် မြှင့်တင်ဖို့ ရည်မှန်းထားသလို စွမ်းအင်ချွေတာမှုကိုလည်း အခုထက် ၅ ဆလောက် ပိုကောင်းအောင် လုပ်ဆောင်သွားမယ်လို့ ဆိုပါတယ်။

လက်ရှိမှာ အဆင့်မြင့် ချစ်ပ်ပြားထုတ်လုပ်မှု ကွင်းဆက်အများစုဟာ ထိုင်ဝမ်ရဲ့ TSMC နဲ့ အစ္စရေးရဲ့ Tower Semiconductor တို့လို အမေရိကန်ပြင်ပက ကုမ္ပဏီတွေမှာပဲ စုနေတာ ဖြစ်ပါတယ်။ ဒါကြောင့် အမေရိကန်အစိုးရဟာ ပြည်တွင်းမှာတင် အဆင့်မြင့် နည်းပညာတွေ ထုတ်လုပ်နိုင်ဖို့အတွက် အခုလို ရန်ပုံငွေတွေ အမြောက်အမြား ထုတ်ပေးနေတာပါ။ အမေရိကန်အစိုးရဟာ အရင်ကလည်း GlobalFoundries ရဲ့ စက်ရုံတွေ တိုးချဲ့ဖို့အတွက် ဒေါ်လာ ၁ ဒသမ ၅ ဘီလီယံအထိ ထောက်ပံ့ပေးခဲ့ဖူးကြောင်း သိရပါတယ်။

သတင်း Source: Reuters