ဇူလိုင် ၁၁၊ ၂၀၂၆

The Kaladan Post

နိုင်ငံတကာ အခြေအနေတွေ ဘယ်လိုပဲ ပြောင်းလဲသွားပါစေ မြောက်ကိုရီးယားနိုင်ငံနဲ့ ရှိထားတဲ့ အစဉ်အလာ ချစ်ကြည်ရင်းနှီးမှုအပေါ် ထားရှိတဲ့ တရုတ်နိုင်ငံရဲ့ ကတိကဝတ်တွေဟာ ပြောင်းလဲသွားမှာ မဟုတ်ဘူးလို့ တရုတ်သမ္မတ ရှီကျင့်ဖျင်က အတည်ပြု ပြောကြားလိုက်ပါတယ်။ မြောက်ကိုရီးယား ခေါင်းဆောင် ကင်ဂျုံအန်းနဲ့ သမ္မတ ရှီကျင့်ဖျင်တို့ကြား အပြန်အလှန် ပေးပို့တဲ့ သဝဏ်လွှာတွေကို ကိုးကားပြီး [မြောက်ကိုရီးယား အစိုးရပိုင် KCNA သတင်းဌာန] က စနေနေ့မှာ အခုလို ဖော်ပြခဲ့တာ ဖြစ်ပါတယ်။

နှစ်နိုင်ငံကြား ချစ်ကြည်ရေး၊ ပူးပေါင်းဆောင်ရွက်ရေးနဲ့ အပြန်အလှန် ကူညီရိုင်းပင်းရေး စာချုပ် ချုပ်ဆိုခြင်း ၆၅ နှစ်ပြည့် အထိမ်းအမှတ်အဖြစ် အခုလို သဝဏ်လွှာတွေ ပေးပို့ခဲ့ကြတာပါ။ သမ္မတ ရှီကျင့်ဖျင်က ၎င်းရဲ့ သဝဏ်လွှာမှာ “နိုင်ငံတကာ အခြေအနေတွေ ဘယ်လိုပဲ ပြောင်းလဲနေပါစေ တရုတ်ကွန်မြူနစ်ပါတီနဲ့ အစိုးရဟာ တရုတ်-မြောက်ကိုရီးယား အစဉ်အလာ ချစ်ကြည်ရေးကို ဆက်လက် အလေးထားသွားမှာဖြစ်သလို အထွေထွေအတွင်းရေးမှူး ကင်ဂျုံအန်းရဲ့ ဦးဆောင်မှုအောက်က မြောက်ကိုရီးယားရဲ့ ဆိုရှယ်လစ်လမ်းစဉ်ကိုလည်း ခိုင်ခိုင်မာမာ ဆက်လက် ထောက်ခံသွားမှာ ဖြစ်ပါတယ်” လို့ ထည့်သွင်း ပြောကြားခဲ့ပါတယ်။ ၎င်းက ဆက်လက်ပြီး နှစ်နိုင်ငံလုံးရဲ့ ဘုံအကျိုးစီးပွားနဲ့ ကောင်းမွန်တဲ့ မဟာဗျူဟာမြောက် ပတ်ဝန်းကျင်ကို ကာကွယ်စောင့်ရှောက်သွားဖို့လည်း ကတိပြုခဲ့ပါတယ်။

မြောက်ကိုရီးယား ခေါင်းဆောင် ကင်ဂျုံအန်းကလည်း တရုတ်နိုင်ငံနဲ့ ချစ်ကြည်ရေးနဲ့ ပူးပေါင်းဆောင်ရွက်မှုတွေဟာ အခုအခါမှာ “မဟာဗျူဟာမြောက် အဆင့်သစ်” တစ်ခုကို ရောက်ရှိလာပြီဖြစ်ကြောင်း ပြန်လည် ရေးသားခဲ့ပါတယ်။ ပြီးခဲ့တဲ့ လပိုင်းကတင် သမ္မတ ရှီကျင့်ဖျင်ဟာ ခုနစ်နှစ်အတွင်း ပထမဆုံးအကြိမ်အဖြစ် ပြုံးယမ်းမြို့ဆီ သွားရောက်လည်ပတ်ခဲ့ပြီး နိုင်ငံရေး၊ စီးပွားရေးနဲ့ ယဉ်ကျေးမှု ကဏ္ဍစုံမှာ ပူးပေါင်းဆောင်ရွက်မှုတွေ တိုးမြှင့်ဖို့ သဘောတူညီခဲ့ကြပါတယ်။

၁၉၆၁ ခုနှစ်၊ ဇူလိုင်လ ၁၁ ရက်နေ့မှာ လက်မှတ်ရေးထိုးခဲ့တဲ့ အဆိုပါ ချစ်ကြည်ရေးစာချုပ်ဟာ လက်ရှိမှာ တရုတ်နိုင်ငံရဲ့ တစ်ခုတည်းသော အပြန်အလှန် ကာကွယ်ရေး သဘောတူညီချက်လည်း ဖြစ်ပါတယ်။ ဒီအထိမ်းအမှတ် အခမ်းအနားကို တက်ရောက်ဖို့အတွက် မြောက်ကိုရီးယား ဝန်ကြီးချုပ် Pak Thae Song ဟာ သောကြာနေ့ကတည်းက ပေကျင်းမြို့ကို သုံးရက်ကြာ ခရီးစဉ်အဖြစ် ရောက်ရှိနေပြီ ဖြစ်ပါတယ်။ အခုလို သဝဏ်လွှာ ဖလှယ်မှုတွေဟာ တရုတ်နဲ့ မြောက်ကိုရီးယားကြားက ခိုင်မာတဲ့ မဟာမိတ်ဆက်ဆံရေးကို ကမ္ဘာကို ထုတ်ဖော်ပြသလိုက်တာလည်း ဖြစ်ပါတယ်။

သတင်းရင်းမြစ် – Reuters / KCNA