စက်တင် ၁၄၊ ၂၀၂၆

The Kaladan Post

အိန္ဒိယနိုင်ငံ နယူးဒေလီမြို့၌ ကျင်းပသည့် BRICS ထိပ်သီးအစည်းအဝေး ပထမနေ့တွင် နိုင်ငံတကာ ပူးပေါင်းဆောင်ရွက်မှု မြှင့်တင်ရေး “နယူးဒေလီ ကြေညာချက်” ကို အဖွဲ့ဝင်နိုင်ငံများက အတည်ပြုခဲ့ကြသလို မြန်မာနယ်စပ် မဏိပူရ်ပြည်နယ်တွင်လည်း လက်နက်ခဲယမ်း အများအပြားကို သိမ်းဆည်းရမိခဲ့ပါတယ်။

ဘာရတ် မန်ဒါပမ် (Bharat Mandapam) ၌ ကျင်းပသော BRICS အစည်းအဝေးတွင် အတည်ပြုခဲ့သည့် အဆိုပါ ကြေညာချက်၌ ဘက်စုံ ပူးပေါင်းဆောင်ရွက်မှုများ ပိုမိုခိုင်မာစေရန်၊ စီးပွားရေးနှင့် ဖွံ့ဖြိုးတိုးတက်ရေး ကဏ္ဍများတွင် ပိုမိုနက်ရှိုင်းစွာ ပူးပေါင်းရန်နှင့် ကမ္ဘာလုံးဆိုင်ရာ ဆုံးဖြတ်ချက် ချမှတ်မှုများတွင် ဖွံ့ဖြိုးဆဲနိုင်ငံများ၏ သြဇာလွှမ်းမိုးမှု ပိုမိုရရှိစေရေးတို့ကို အလေးပေး တိုက်တွန်းထားပါတယ်။

အိန္ဒိယ ကာကွယ်ရေး သတင်းများအရ မဏိပူရ်ပြည်နယ် ချန်ဒဲလ် (Chandel) ခရိုင်ရှိ အိန္ဒိယ-မြန်မာ နယ်စပ်တစ်လျှောက်တွင် အာသံရိုင်ဖယ် တပ်ဖွဲ့ဝင်များက နယ်မြေရှင်းလင်းရေး ဆောင်ရွက်စဉ် လက်နက်ခဲယမ်း အများအပြားကို သိမ်းဆည်းရမိခဲ့ပါတယ်။ သိမ်းဆည်းရမိသည့် ပစ္စည်းများတွင် ပေါမ်ပီ (Pompi) ၃ လက်၊ ပြောင်းချောသေနတ် ၆ လက်၊ ကာဘိုင် ၃ လက်၊ လာသိုဒ် (Lathod) သေနတ် ၂ လက်၊ လက်ပစ်ဗုံး ၂ လုံး၊ လက်လုပ်မိုင်း ၂ လုံးနှင့် ကျည်ဆန်များ ပါဝင်တယ်လို့ သိရပါတယ်။

ထို့အပြင် အိန္ဒိယနှင့် အမေရိကန် တပ်မတော်တို့အကြား “Yudh Abhyas 2026” ပူးတွဲ စစ်ရေးလေ့ကျင့်မှုကို ရာဂျက်စသန်နှင့် ဥတ္တရာခမ်း ပြည်နယ်တို့တွင် စက်တင်ဘာ ၁၁ ရက်က စတင် ပြုလုပ်နေပါတယ်။ BRICS ထိပ်သီးအစည်းအဝေး ပြင်ပတွင်လည်း အိန္ဒိယ ဝန်ကြီးချုပ် နာရင်ဒရာ မိုဒီ နှင့် မလေးရှား ဝန်ကြီးချုပ် အန်နဝါ အီဘရာဟင် တို့ တွေ့ဆုံ၍ ကာကွယ်ရေး ပူးပေါင်းဆောင်ရွက်မှု ကိစ္စရပ်များကို ဆွေးနွေးခဲ့ကြပါတယ်။

တရားဥပဒေ စိုးမိုးရေး ကဏ္ဍတွင် အိန္ဒိယ ဗဟိုစုံစမ်းစစ်ဆေးရေးဗျူရို (CBI) သည် မော်လ်ဒိုဗာနိုင်ငံမှတစ်ဆင့် အနီရောင်အဆင့် ဝရမ်းပြေး အမ်ရစ်ပယ်လ်ဆင်းဂ် (Amritpal Singh) ကို အိန္ဒိယသို့ ပြန်လည် လွှဲပြောင်းခေါ်ဆောင်နိုင်ခဲ့ပါတယ်။ အမျိုးသားစုံစမ်းစစ်ဆေးရေး အေဂျင်စီ (NIA) ကလည်း ဂျမူးနှင့် ကက်ရှ်မီးယား ဒေသရှိ နေရာ ၁၀ ခုတွင် နယ်စပ်ဖြတ်ကျော် အကြမ်းဖက်မှု ကွန်ရက်များနှင့် ပတ်သက်၍ ဝင်ရောက်ရှာဖွေမှုများ ပြုလုပ်ခဲ့ပါတယ်။

Source – Saachibaat